დაუსწრებელი გადაწყვეტილება

სამოქალაქო დავის პროცესში მხარეებს ხშირად ჰგონიათ, რომ სასამართლოში არგამოცხადება ან პასუხის არგაცემა პროცესს შეაფერხებს.

სინამდვილეში, საქართველოს სამოქალაქო საპროცესო კოდექსი ითვალისწინებს მექანიზმს, რომელიც „პასიურ“ მხარეს საკმაოდ მძიმე სამართლებრივ მდგომარეობაში აყენებს. ამას დაუსწრებელი გადაწყვეტილება ეწოდება.

რა არის დაუსწრებელი გადაწყვეტილება?

ეს არის სასამართლოს მიერ გამოტანილი გადაწყვეტილება, როდესაც ერთ-ერთი მხარე არ ასრულებს თავის საპროცესო მოვალეობას, მაგალითად, არ წარადგენს პასუხს (შესაგებელს) კანონით დადგენილ ვადაში ან არ ცხადდება სასამართლო სხდომაზე.

ამ დროს სასამართლო არ ელოდება მეორე მხარეს და გადაწყვეტილებას იღებს მხოლოდ იმ ფაქტობრივ გარემოებებზე დაყრდნობით, რომლებსაც მომჩივანი (მოსარჩელე) მიუთითებს.

როდის შეიძლება გამოიტანოს სასამართლომ დაუსწრებელი გადაწყვეტილება?

საქართველოს კანონმდებლობით, დაუსწრებელი გადაწყვეტილების გამოტანა შესაძლებელია ორ შემთხვევაში:

• როდესაც მოპასუხე კანონით დადგენილ ვადაში არ წარადგენს წერილობით პასუხს ან

• როდესაც ერთ-ერთი მხარე (მოსარჩელე ან მოპასუხე) არ გამოცხადდება სხდომაზე, მიუხედავად იმისა, რომ მას ეცნობა დროისა და ადგილის შესახებ.

დაუსწრებელი გადაწყვეტილების გამოტანისას მოქმედებს ე.წ. ფაქტობრივი გარემოებების აღიარების პრეზუმფცია. ეს ნიშნავს, რომ თუ თქვენ არ გამოცხადდით, სასამართლო მიიჩნევს, რომ თქვენ ეთანხმებით მოწინააღმდეგე მხარის მიერ დასახელებულ ყველა ფაქტს. სასამართლო მხოლოდ იმას ამოწმებს, რამდენად გამომდინარეობს სარჩელის მოთხოვნა ამ ფაქტებიდან იურიდიულად. წინააღმდეგ შემთხვევაში სასამართლო უარს ეტყვის მოსარჩელეს მის დაკმაყოფილებაზე.

შესაძლებელია თუ არა დაუსწრებელი გადაწყვეტილების გაუქმება?

დიახ, მხარეს, რომელიც არ გამოცხადებულა სასამართლო სხდომაზე, რის გამოც მის წინააღმდეგ გამოტანილია დაუსწრებელი გადაწყვეტილება, აგრეთვე მოპასუხეს სამოქალაქო საპროცესო კოდექსის 232'  მუხლით გათვალისწინებულ შემთხვევაში, შეუძლიათ ასეთი გადაწყვეტილების გამომტან სასამართლოში შეიტანონ საჩივარი დაუსწრებელი გადაწყვეტილების გაუქმებისა და საქმის განახლების შესახებ.

გასაჩივრების ვადა: 10 დღე.

პირობა: საჩივარში უნდა დაასაბუთოთ, რომ სხდომაზე გამოუცხადებლობა გამოწვეული იყო საპატიო მიზეზით (მაგალითად, ავადმყოფობა, ფორსმაჟორი ან უწყების ჩაუბარებლობა).

თუ სასამართლო საჩივარს დააკმაყოფილებს, პროცესი ჩვეულებრივ რეჟიმში განახლდება. თუმცა, გაითვალისწინეთ, რომ „მეორედ“ დაუსწრებელი გადაწყვეტილების გამოტანის შემთხვევაში, მისი გასაჩივრება გაცილებით რთულია და მხოლოდ ზემდგომ ინსტანციაშია შესაძლებელი.

ნებისმიერი დოკუმენტი, რომელსაც სასამართლოდან იღებთ, საჭიროებს მყისიერ რეაგირებას.

საპროცესო ვადების გაშვებამ შესაძლოა ისეთ შედეგამდე მიგიყვანოთ, სადაც თქვენი სიმართლის დამტკიცების შანსი მინიმალური იქნება.

თუ ჩაიბარეთ სარჩელი ან დაუსწრებელი გადაწყვეტილება, ჩვენი გუნდი მზად არის დაგეხმაროთ.

კითხვების შემთხვევაში, დაგვიკავშირდით.

Law Office/იურიდიული კომპანია OK&CG.