ქორწინების ბათილად ცნობა: რა უნდა ვიცოდეთ?

ხშირად საზოგაგოებას ერთმანეთში ერევა ქორწინების შეწყვეტა (განქორწინება) და ქორწინების ბათილად ცნობა. თუმცა, სამართლებრივი თვალსაზრისით, მათ შორის არსებითი განსხვავებაა.

ქორწინების შეწყვეტა VS ქორწინების ბათილობა

თუ განქორწინება ნამდვილი ქორწინების დასასრულია, ბათილად ცნობა ნიშნავს, რომ ქორწინებას რეგისტრაციის მომენტიდანვე არ წარმოუშვია იურიდიული შედეგები.

წინამდებარე ბლოგში განვიხილავთ იმ ძირითად შემთხვევებს, როდესაც კანონმდებლობა ქორწინების გაუქმების შესაძლებლობას იძლევა.

ვინ და როგორ ადგენს ქორწინების ბათილობას?

მნიშვნელოვანია გვახსოვდეს, რომ ქორწინება არ შეიძლება ჩაითვალოს ბათილად მხოლოდ მხარეთა სურვილით.

სამოქალაქო კოდექსის 1140-ე და 1148-ე მუხლის თანახმად:

ქორწინების ბათილად ცნობის უფლებამოსილება ექსკლუზიურად სასამართლოს გააჩნია. სანამ არ არსებობს სასამართლოს კანონიერ ძალაში შესული გადაწყვეტილება, ქორწინება ნამდვილად ითვლება.

რა შემთხვევაში შეიძლება ქორწინება ბათილად იქნეს ცნობილი?

კანონმდებლობა მკაცრად განსაზღვრავს ბათილობის საფუძვლებს:

• საქორწინო პირობების დარღვევა: მაგალითად, ნების თავისუფალი გამოხატვის არარსებობა ან ასაკობრივი ზღვრის დაუცველობა.

• დამაბრკოლებელი გარემოებები: თუ პირები უკვე იმყოფებიან სხვა ქორწინებაში, არიან ახლო ნათესავები ან არსებობს სხვა კანონისმიერი აკრძალვა (მუხლი 1120).

• ფიქციური ქორწინება: როდესაც რეგისტრაციის მიზანი არა ოჯახის შექმნა, არამედ სხვა სარგებლის მიღებაა (მაგალითად, მოქალაქეობის მოპოვება).

• იძულება: თუ ქორწინება ძალადობის ან მუქარის შედეგად შედგა.

შენიშვნა: ფიქციური ქორწინება ვერ გახდება ბათილობის საფუძველი, თუ სასამართლო განხილვამდე მეუღლეებმა ფაქტობრივად უკვე შექმნეს ოჯახი.

კეთილსინდისიერი მეუღლის დაცვა და ქონებრივი საკითხები

ქორწინების ბათილად ცნობას მძიმე სამართლებრივი შედეგები მოჰყვება - ის უქმდება რეგისტრაციის დღიდან.

თუმცა, კანონი იცავს „კეთილსინდისიერ მეუღლეს“ (პირს, რომელმაც არ იცოდა ბათილობის საფუძვლების შესახებ):

• კეთილსინდისიერ მეუღლეს შეიძლება მიეკუთვნოს სარჩო (ალიმენტი) მეორე მხარისგან.

• ქონება შეიძლება გაიყოს ისე, როგორც ნამდვილი ქორწინების დროს.

• მას უფლება აქვს მოითხოვოს მიყენებული ქონებრივი ზიანის ანაზღაურება.

როდის არის დაგვიანებული სარჩელის აღძვრა?

კანონი ადგენს ერთ მნიშვნელოვან შეზღუდვას: ქორწინების ბათილად ცნობა შეუძლებელია ორივე მეუღლის გარდაცვალების შემდეგ.

ქორწინების ბათილობა რთული სამართლებრივი პროცესია, რომელიც მოითხოვს მყარ მტკიცებულებებს.

თუ დამაბრკოლებელი გარემოებები აღმოიფხვრა (მაგალითად, პირი განქორწინდა წინა მეუღლესთან), სასამართლოს შეუძლია ქორწინება ნამდვილად ცნოს იმ მომენტიდან, როცა დამაბრკოლებელი გარემოება გაქრა.

კითხვების შემთხვევაში, დაგვიკავშირდით.

Law Office/იურიდიული კომპანია OK&CG.