რა უნდა მოვიმოქმედოთ, როცა კომპანია ბინას დათქმულ ვადაში არ გვაბარებს?

უძრავი ქონების შერჩევისას, განსაკუთრებით, მშენებარე მდგომარეობაში, ძალიან დიდი ყურადღება გვმართებს, რათა შემდგომი გართულებები ავირიდოთ თავიდან. ამ პროცესში არსებითი ადგილი სამართლებრივ ინფორმირებულობას უჭირავს.

განსაკუთრებით ხშირია ვადის გადაცილების პრობლემა, რომელიც არამხოლოდ მსხვილი და წარმატებული კომპანიების, ასევე შედარებით პატარა კომპანიების შემთხვევაშიც იჩენს თავს.

უძრავი ქონების შეძენის რა რეგულაციას ითვალისწინებს კანონმდებლობა?

უძრავ ნივთზე საკუთრების წარმოშობისათვის, საქართველოს სამოქალაქო კოდექსი მოძრავი ნივთების შემთხვევისგან განსხვავებულ წესს ადგენს, რაც მოიაზრებს შემდეგს:

იმისათვის, რათა ბინის შემძენი ჩაითვალოს უძრავი ნივთის მესაკუთრედ და წარმოეშვას მესაკუთრის უფლება-მოვალეობები, აუცილებელია 2 კომპონენტის დაცვა:

1. ხელშეკრულების წერილობითი ფორმით დადება და

2. საჯარო რეესტრში უძრავი ნივთის მესაკუთრედ რეგისტრაცია.

საჯარო რეესტრის უტყუარობისა და სისრულის პრეზუმფციიდან გამომდინარე, უძრავის ნივთის მესაკუთრედ სწორედ ის პირი ითვლება, ვინც ასეთად რეგისტრირებულია საჯარო რეესტრში.

შესაბამისად, თუკი რეესტრში მესაკუთრედ რეგისტრაცია არ განხორციელდა, მხოლოდ ხელშეკრულების დადება საკუთრების უფლებას ვერ შეცვლის უძრავ ნივთზე.

საკუთრების უფლება შემძენზე წარმოიშობა სარეგისტრაციო წარმოების დასრულების შემდგომ.

ბინის შეძენა საკმაოდ რთული პროცესია და დეტალურ დაკვირვებას საჭიროებს, განსაკუთრებით, ხელშეკრულების გაფორმებამდე.

უმჯობესია, შეამოწმოთ გამყიდველი კომპანია სამეწარმეო რეესტრში, რათა მიიღოთ ინფორმაცია შესაძლო აკრძალვებისა და ყადაღების შესახებ, რამაც შესაძლოა სამომავლოდ დაბრკოლებები წარმოქმნას.

ასევე, სასურველია შეამოწმოთ უძრავი ქონების სტატუსიც, რათა გამოირიცხოს ფართზე რაიმე სახის შეზღუდვა/იპოთეკა/სხვა ვალდებულება.

რა უნდა მოვიმოქმედოთ, როცა კომპანია ბინას არ გვაბარებს დათქმულ ვადაში?

ვადის გადაცილების პრობლემა არამხოლოდ მსხვილი და წარმატებული კომპანიების, ასევე შედარებით პატარა კომპანიების შემთხვევაშიც იჩენს თავს.

ამ საკითხთან დაკავშირებით, მნიშვნელოვანი ყურადღება უნდა დაეთმოს ხელშეკრულებას მომხმარებელსა და კომპანიას შორის.

უნდა იყოს განსაზღვრული შესაბამისი ვადა, როდისაა შესაძლებელი ხელშეკრულების შეწყვეტა, ასევე, ვადაგადაცილების შემთხვევაში, რა სანქციაა გათვალისწინებული და სხვ.

შენობის ექსპლუატაციაში მიღება

შენობის ექსპლუატაციაში მიღება საკმაოდ მრავალსაფეხურიანი პროცესია და შესაბამისად, გონივრული ვადების დაცვა საჭირო და აუცილებელიც კია.

თუკი ირღვევა შენობის ექსპლუატაციაში მიღების განსაზღვრული და გონივრული ვადა, ასეთ შემთხვევაში უკვე შესაძლებელია სასამართლოსთვის მიმართვა.

ამ მიმართულებით მომართვიანობა საკმაოდ მომატებულია.

დღესდღეობით უფრო მეტად ცდილობენ მსგავსი საკითხები იურისტების/ადვოკატების ჩართულობით გადაწყვიტონ, რათა შეძლონ გააზრებული და ინფორმირებული ნაბიჯების გადადგმა.

კითხვების შემთხვევაში, დაგვიკავშირდით.

Law Office/იურიდიული კომპანია OK&CG.