ავტოსაგზაო შემთხვევა

სამართლებრივი რჩევები

რა უნდა გაითვალისწინოთ ავტოსაგზაო შემთხვევისას?

თუ ავტოსაგზაო შემთხვევის შედეგად დააზიანეთ ავტომანქანა და სადაზღვევოს მიერ წარმოდგენილი ზიანის კალკულაცია არარეალურია, მაშინ ეს უნდა იცოდე:

ავტოსაგზაო შემთხვევისას უნდა იმოქმედო რაც შეიძლება სწრაფად და გონივრულად. პირველივე დღიდან სანამ სადაზღვევო დაიწყებს დაზიანებული ავტომანქანის შეკეთებას, აუცილებლად უნდა დააფიქსიროთ უმნიშვნელო დეტალიც კი, ანუ ავტომანქანის ფაქტობრივი მდგომარეობა.

რჩევები ავტოსაგზაო შემთხვევისას

გადაუღეთ ფოტოები დაზიანებულ მანქანას, სხვადასხვა რაკურსით:

გადაიღეთ ავარიის ადგილი, საგზაო ნიშნები, გზის მდგომარეობა, შუქნიშნები, ასევე მანქანის პოზიცია ავარიის შემდგომ მომენტში.

სადაზღვევო კომპანიამ მოგვიანებით შეიძლება წარადგინოს არარეალური ღირებულების ინვოისები

და თქვას, რომ შენმა ქმედებამ მნიშვნელოვანი ზიანი გამოიწვია. შენ კი, გადაღებული ფოტოებით შეძლებ დაამტკიცო, რომ ზიანი არც ისეთი მასშტაბური იყო, როგორც ეს ინვოისშია აღწერილი.

გადაუღეთ ფოტოები ავტომანქანის ტექნიკური დათვალიერების (ინსპექტირების) დოკუმენტს და VIN კოდს, რადგან:

ეს დოკუმენტი და განსაკუთრებით VIN კოდი (უნიკალური 17-ნიშნა იდენტიფიკატორი) გამოიყენება დაზიანებული ავტომანქანის კონკრეტულად იმ მოდელის დასადგენად, რომელთანაც ინციდენტი მოხდა.

ასევე, თუ დანიშნავ ექსპერტიზას ან თუ საქმე მივა სასამართლომდე, აუცილებელია, რომ ზუსტად იყოს ცნობილი რომელი მანქანა დაზიანდა.

ტექნიკური დათვალიერების პასპორტი და VIN კოდი იდენტიფიკაციას უზრუნველყოფს.

სხვა მანქანის დაზიანება

სადაზღვევო კომპანიამ შესაძლოა მოგვიანებით თქვას, რომ დაზიანდა სხვა მანქანაც (მაგ., იგივე მოდელის, მაგრამ სხვა ნომრის ან მდგომარეობის მქონე).

შენ კი, თუ გექნება VIN-ის ფოტო, ზუსტად დაამტკიცებ, რომ სწორედ ის მანქანა იყო, რომელიც შემთხვევის დროს იქნა დაზიანებული.

ავარიის შემდეგ დაუყოვნებლივ დანიშნეთ ექსპერტიზა

ექსპერტიზის მიზანს წარმოადგენს მიყენებული ზიანის ობიექტურად და ზუსტად დადგენა, სანამ დაზიანებული ტრანსპორტი აღდგება.

ექსპერტიზის დასკვნის მნიშვნელობა იმაში მდგომარეობს, რომ ის იქნება სასამართლოში თქვენი დაცვის ძირითადი მტკიცებულება.

თუ არ გექნებათ ექსპერტიზის დასკვნა, სასამართლო იხელმძღვანელებს სადაზღვევო კომპანიის მიერ წარდგენილი ინვოისებით, რომელშიც ხშირად მითითებულია არარეალური ფასები, ხოლო როცა ტრანსპორტი აღდგენილია, ზიანის დადგენა უკიდურესად რთულია ან შეუძლებელი.

ექსპერტიზას კი ფოტოები დაეხმარება ზარალის ობიექტურად შეფასებაში, განსაკუთრებით იმ შემთხვევაში, თუ დაზიანებული ტრანსპორტი ამ დროისთვის უკვე აღდგენილია.

შემთხვევის ვიდეო-გადაღება

აგრეთვე უმჯობესი იქნება გადაიღოთ ვიდეოც, რადგან ხშირად ვიდეოს კადრი უკეთ ასახავს დარტყმის ხარისხსს და შესაძლებელი ხდება ზიანის ანაზღაურების ზუსტად განსაზღვრა.

მოკლე ჩანაწერები

ჩაიწერე გარემოებები მოკლედ, სად მოხდა, რა ვითარებაში, რა სიჩქარით მოძრაობდი, როგორი იყო ხილვადობა, გზა და ა.შ.

დასკვნა

შეინახეთ ყველა ის ფოტო და მტკიცებულებები რაც დაკავშირებულია ავტოსაგზაო შემთხვევასთან, რადგან ავარიის შემდეგ შეიძლება გავიდეს გარკვეული დრო სანამ სადაზღვევო კომპანია დაგიკავშირდებათ.

ისინი ზიანის ანაზღაურებას მოგთხოვენ ხშირად უკვე აღდგენილი ტრანსპორტის ინვოისებზე დაყრდნობით.

ავტორი: ბაია ტეფნაძე, იურიდიული ფაკულტეტის სტუდენტი