აღსრულების ეროვნულმა ბიურომ თავის მომსახურებებს კიდევ ერთი, ნოვაციური და საინტერესო სერვისი დაამატა, რომლით სარგებლობაც მოსახლეობას პირველი აგვისტოდან შეეძლება. ახალი სერვისი – „ფაქტების კონსტატაცია”, საშუალებას გაძლევთ ოფიციალურად დააფიქსიროთ თქვენთვის მნიშვნელოვანი ფაქტი და მიიღოთ ოქმი, რომელსაც მტკიცებულებად გამოიყენებთ. ეს სერვისი მოსახლეობას შეუძლია გამოიყენოს: ქონების გაქირავებამდე მისი მდგომარეობის ასახვისთვის; სამეზობლო დავებისას – წყლის ჩამოშვებისას, საერთო სარგებლობის კიბით, სხვენით ან გზით სარგებლობის ხელისშეშლის შემთხვევაში;

ჩუქების; გაყრის; ქონების გაყოფის; მემკვიდრეობით მიღების დროს ქონების სრული ინვენტარიზაციისათვის;

შესრულებული სამუშაოს აღწერისთვის, მაშინ, როდესაც დამზადებული ნივთი ან საქონელი არ აკმაყოფილებს კონტრაქტის პირობებს;

საავტორო უფლებების დაცვისათვის;

პირატული პროდუქციის გაყიდვის დაფიქსირებისათვის; განქორწინების პირობების შეუსრულებლობისას;

სტიქიური უბედურების ან სხვა სახის ავარიულ სიტუაციებში ზარალის შესახებ დადასტურებული ფაქტის დასადგენად; დაკვეთის შესრულების დროში უმიზეზოდ გაწელვისას.

ეს არასრული ჩამონათვალია იმ ყველაფრისა, რაშიც ეს ახალი მომსახურება შეგიძლიათ გამოიყენოთ. ვარაუდობენ, რომ „ფაქტების კონსტატაციის” სერვისი მნიშვნელოვნად შეამცირებს სასამართლო პროცესების ხანგრძლივობას მტკიცების სტადიის ხარჯზე; ხელს შეუწყობს ინტელექტუალური საკუთრების დაცვის გაძლიერებას და მოახდენს უფლებათა წინასწარგანზრახული დარღვევის პრევენციას. სერვისით სარგებლობა შესაძლებელია საქართველოს ყველა რეგიონში. ((წყარო:http://nbe.gov.ge))